Dit het onder ons aandag gekom dat Afriforum Afrikaners wat op sosiale media, Afriforum en daarmee saam Solidariteit, “belaster” deur hulle te assosieer met boere wat van moord aangekla is, as sou hierdie aangeklaagdes lede van Afriforum was of is, nou dreig met “regsoptrede”.

Dat daar geen regverdiging vir moord is nie is onweerlegbaar. Dat daar onregverdige omstandighede geskep is wat ten grondslag lê aan sulke gedrag, hetsy die moord, ditsy die aantygings, waar of onwaar, is egter ook onweerlegbaar.

Dat beide Afriforum en Solidariteit by die ontstaan van hierdie omstandighede betrokke was en steeds is, is óók onweerlegbaar en behoort hulle begrip te hê vir die voorspelde simptome! Ek lys derhalwe terwille van nugterheid, ‘n brief van wyle mnr. Jaap Marais aan F.W. de Klerk.

DIE TOPPUNT VAN IMMORALITEIT

‘n Onderhandelde skikking na selfmoord? Nie nou nie, nie môre nie, nooit ooit nie! Sommige “Afrikaners” het geen geheue nie, ander, van die jongeres, het weer géén ore wat kan hoor nie omdat hulle “geleerdheid” bo hulle begripsvermoë uitgegaan het. Dit was die wyse Jaap Marais wat eendag teenoor my die opmerking gemaak het: “ Jong, die Engelse het ‘n spreekwoord wat sê, this man was educated beyond his intelligence.” Die AVP plaas graag hierdie brief van hom aan FW.

Terselfdertyd wil ek sê aan dr. Herman en Flip Buys, indien u na die lees van hierdie brief steeds in ontkenning wil leef, u skuldig staan nie net aan die toppunt van immoraliteit nie, maar ook vrywillig meewerk aan die Amerikaanse eis vir aanvaarding vir selfmoord van ons volk! Lees die brief oor en oor en kyk dan om u en glo wat u sien! Die ondertekening van die Belawet is net nog 'n positiewe maatreël op die pad van uitwissing van ons volk se taal, kultuur en uiteindelik identiteit! Dr. Herman, u bestempel dit as 'n oorlogsverklaring! Erken tog nou dat julle verkeerd was en is en indien julle met die verwerping van die beleid van Afsonderlike Ontwikkeling voortgaan, ons nie verkwalik as julle as volksverraaiers beskou word nie!